logo

Tag: Mosfellsbær

Höldum vegferðinni áfram

Posted on by Sævar Birgisson

14. maí, 2026

Kæri sveitungi.

Mosfellsbær er einstakur staður til að búa á og það eru mikil forréttindi að fá að taka þátt í að þróa og byggja samfélagið okkar áfram. Það sem stendur upp úr fyrir mér á síðustu árum er hversu sterkur vilji er meðal íbúa til að halda áfram að gera góðan bæ enn betri fyrir börnin okkar, fjölskyldurnar, eldra fólkið og alla sem búa hér í Mosfellsbæ.

Þegar við göngum til sveitarstjórnarkosninga þann 16. maí finnst mér mikilvægt að við horfum ekki bara á loforð um framtíðina heldur líka til þess sem hefur áunnist. Á síðasta kjörtímabili hefur verið unnið markvisst að því að bæta þjónustu og aðstöðu í bænum okkar. Nýr leikskóli og nýtt íþróttahús voru tekin í notkun. Hlégarður hefur fengið nýtt líf sem félagsheimili Mosfellinga og Brúarland hefur orðið mikilvæg miðstöð fyrir félagsstarf eldri borgara. Við höfum einnig lagt áherslu á að bæta leiksvæði, skólalóðir og aðstöðu til íþróttaiðkunar um allan bæ.

Börnin okkar og bætt þjónusta

Verkefnið Börnin okkar hefur sett stóran svip á kjörtímabilið. Þar höfum við lagt áherslu á að styrkja umhverfi barna og fjölskyldna og byggja upp samfélag þar sem börn fá tækifæri til að blómstra. Samhliða því höfum við lagt mikla áherslu á stafræna þróun og bætta þjónustu við íbúa. Á síðustu árum hafa verið innleidd um 40 stafræn verkefni í stjórnsýslu bæjarins og nýtt þjónustuver opnað í Kjarnanum með bættri aðstöðu fyrir bæjarbúa.

Þessi góða vinna hefur ekki farið fram hjá fólki. Mosfellsbær hlaut tilnefningu til Nýsköpunarverðlauna hins opinbera árið 2026 fyrir stafræna vegferð sveitarfélagsins og verkefnið Börnin okkar. Þá sýndi þjónustukönnun Gallup að 93% íbúa eru ánægð með Mosfellsbæ sem stað til að búa á, sem er besti árangur meðal sveitarfélaga í könnuninni. Það eru niðurstöður sem við getum öll verið stolt af.

Framtíð Mosó

Á næsta kjörtímabili viljum við meðal annars halda áfram uppbyggingu á Varmársvæðinu með stúku- og þjónustubyggingu, klára efstu hæð Brúarlands til að efla félagsstarf enn frekar og nýta aðra hæð Hlégarðs fyrir menningarstarfsemi. Þá viljum við halda áfram að þróa verkefnið Börnin okkar og bæta þjónustu bæjarins okkar enn frekar.

Ég trúi því að við séum á góðri leið og að með áframhaldandi ábyrgð, samvinnu og metnaði getum við gert Mosfellsbæ enn betri.

Ég vona að þú sjáir ástæðu til að halda þessari vegferð áfram með okkur.

Þetta snýst um Mosó – setjum X við B á kjördag.

Sævar Birgisson
Oddviti Framsóknar í Mosfellsbæ

Greinin var birt í Mosfellingi – 14. maí 2026

Tryggjum ungu fólki sæti við borðið

Posted on by Leifur Ingi Eysteinsson

14. maí, 2026

Ég er stoltur að vera í þriðja sæti á lista Framsóknar fyrir komandi kosningar í Mosfellsbæ því ég vil taka þátt í að móta framtíð bæjarins sem ég ólst upp í. Mosfellsbær hefur vaxið hratt á síðustu árum. Því er mikilvægt að nýjar raddir fái að heyrast, ekki síst raddir ungs fólks.

Ungt fólk til ábyrgðar

Það sem hefur heillað mig við Framsókn er að flokkurinn treystir ungu fólki til ábyrgðar. Ef ég næ kjöri gæti ég orðið fyrsti bæjarfulltrúinn í Mosfellsbæ undir þrítugu og þar með yngsti í sögunni. Það sýnir kannski best hversu lengi unga fólkið í bænum hefur verið án raddar í bæjarstjórninni.

Á síðustu árum hefur margt áunnist í Mosfellsbæ og þar hefur skipt máli að þora að taka erfiðar ákvarðanir til lengri tíma litið. Það var til dæmis umdeild ákvörðun að taka Hlégarð aftur inn í bæinn, þó auðvelt sé að segja í dag að það hafi verið augljóst skref. Sú ákvörðun hefur hins vegar styrkt menningar- og samfélagslífið í bænum.

Sama má segja um breytingarnar á Varmársvæðinu. Auðveldasta ákvörðunin hefði verið að halda frjálsíþróttabrautinni óbreyttri eins og hún var. Í staðinn var ákveðið að færa
hlaupabrautina, byggja 200 metra braut við hlið vallarins og undirbúa að færa stúkuna nær vellinum í næsta skrefi uppbyggingarinnar. Það voru stór skref sem hafa heppnast mjög vel og skapað mun betri upplifun og aðstöðu fyrir íþróttafólk og áhorfendur.

Þá hefur einnig verið fjárfest af krafti á Varmársvæðinu með nýjum aðalvelli, endurbættum gervigrasvöllum og bættri aðstöðu fyrir Aftureldingu.

Þar skiptir máli að hugsa til framtíðar og gera hlutina almennilega. Það borgar sig ekki alltaf að velja ódýrustu lausnina. Þegar byggt er upp fyrir samfélagið eigum við að horfa til gæða og endingar. Á Varmársvæðinu eigum við til dæmis að stefna hátt, fara í lausnir sem standast nútímakröfur og UEFA standard frekar en hálfkák.

Það sama á við um aðstöðu fyrir ungt fólk víða um bæinn. Nú stendur til að bæta
körfuboltavöllinn við Kvíslarskóla með plast undirlagi, þar sem upphaflega var farið í einfaldari og ódýrari lausn sem hefur nýst illa. Slík verkefni skipta máli því þau skapa fleiri tækifæri til hreyfingar, samveru og lýðheilsu fyrir börn og ungmenni.

Styrkjum samfélagið til framtíðar

Mosfellsbær þarf bæði reynslu og ný sjónarmið. Með því að treysta ungu fólki til ábyrgðar styrkjum við samfélagið til framtíðar. Kjósum Framsókn til þess að gefa ungu fólki sæti við borðið.

Leifur Ingi Eysteinsson
3. sæti á lista Framsóknar í Mosfellsbæ

Greinin var birt í Mosfellingi – 14. maí 2026

Virði en ekki byrði

Posted on by Halla Karen Kristjánsdóttir

14. maí, 2026

Þetta kjörtímabil hefur liðið ótrúlega hratt. Þegar ég lít til baka sé ég hversu mikið hefur áunnist og hversu mikið ég sjálf hef lært. Störfin í bæjarstjórn og bæjarráði hafa verið bæði gefandi og krefjandi – verkefnin oft flókin og ábyrgðin mikil. En á sama tíma hef ég fundið hvað það skiptir máli að vinna af heilindum, fagmennsku og í góðu samstarfi. Það hefur verið leiðarljós okkar í Framsókn.

Eitt af því sem ég er hvað stoltust af er hvernig við höfum byggt upp þjónustu við eldra fólk í Mosfellsbæ. Mér finnst mikilvægt að rödd þess heyrist, því reynsla og þekking eldra fólks er styrkur fyrir samfélagið.

Stórsókn í velferð á kjörtímabilinu

Félagsstarfið í Brúarlandi er frábært dæmi um þjónustuna. Þegar starfsemin var flutt þangað varð algjör viðsnúningur – þátttaka jókst um 40% og það er engin tilviljun.  Starfsfólkið þar er einstakt, hlýtt og skapandi og hefur byggt upp samverustað þar sem fólk hittist, hlær og lærir. Ég vil halda áfram að efla þetta samfélag og tel mikilvægt að þriðja hæð hússins verði einnig nýtt undir félagsstarf.

Famos á líka hrós skilið. Þau eru hjartað í menningu, hreyfingu og tómstundum eldra fólks í bænum og vinna af mikilli elju. Mosfellsbær styður þau með húsnæði og fjármagni, og það samstarf hefur skilað sér í fjölbreyttu og lifandi starfi.

Annað skemmtilegt og sjálfsprottið verkefni er Karlar í skúrum.  Þar fer fram verðmæt starfsemi fyrir karla á öllum aldri.

Eitt stærsta framfaraskref kjörtímabilsins var þátttaka í tilraunaverkefninu Gott að eldast. Með samþættingu heimaþjónustu og heimhjúkrunar sér nú einn aðili, Eir, um þjónustuna sem áður var á hendi fjögurra. Þetta hefur gert þjónustuna markvissari og auðveldara að bregðast hratt við þegar þörf er á. Þó ber Mosfellsbær áfram ábyrgð á gæðum þjónustunnar – og það er mikilvægt.

Við höfum líka fjölgað dagdvalarrýmum úr 9 í 35, sem er gríðarlega stórt skref. Það gerir okkur kleift að styðja mun fleiri einstaklinga og fjölskyldur þeirra. Þá hefur nýtt endurhæfingarteymi hafið störf sem og vitjar fólks heim til að efla sjálfstæði þess og sjálfsbjargargetu. Þetta eru úrræði sem skipta raunverulegu máli í daglegu lífi fólks.

Hrós og þakklæti

Það gleður mig að heyra að opinberir aðilar vísa til Mosfellsbæjar sem fyrirmyndar í þjónustu við eldri borgara. Það er staðfesting á því að við erum á réttri leið – og ég vil halda áfram á þeirri braut.

Fram undan vil ég sjá aukin kynslóðatengsl, því fjarlægðin milli kynslóða hefur aukist og einmanaleiki er raunverulegt vandamál. Eldra fólk á skilið samfélag sem styður það, hlustar og metur að verðleikum.  Ég trúi því að tæknilausnir, ný hugsun og áframhaldandi uppbygging geti gert Mosfellsbæ að enn betra aldursvænu samfélagi.

Framsókn vill halda áfram að byggja á þeim sterka grunni sem lagður hefur verið á kjörtímabilinu.

Í lokin vil ég að segja þetta: Ég hef unnið talsvert mikið með eldra fólki hér í Mosfellsbæ í gegnum tíðina og verð ævinlega þakklát fyrir allt það sem þau hafa kennt mér og mun lifa innra með mér út ævina. Aldur er svo sannarlega auðlind.

Halla Karen Kristánsdóttir formaður bæjarráðs og skipa 2. sætið á lista Framsóknar  

Greinin var birt í Mosfellingi – 14. maí 2026

Hugsum stórt og til framtíðar

Posted on by Halla Karen Kristjánsdóttir

24. apríl, 2026

Ég flutti í Mosfellsbæinn árið 1995, hef búið hér síðan og finnst eins og ég hafi búið hér alla tíð. Mín skoðun er að gott samfélag verði ekki til nema bæjarbúar taki þátt og hjálpi til og tel ég mig hafa lagt mitt fram við að búa til góðan bæjarbrag á þessum árum.

Ég steig stærra skref vorið 2022 þegar ég ákvað að bjóða mig fram til sveitarstjórnar með góðu fólki í Framsókn. Ég hef ákveðið að bjóða aftur fram krafta mína enda áhugi minn á að starfa fyrir bæinn okkar óbreyttur. Við Sævar Birgisson bæjarfulltrúi höfum þó skipt um sæti á listanum og hann tekið við oddvitasætinu. Við erum í þessu af hugsjón, fyrir samfélagið, og vinnum áfram saman af ábyrgð og fagmennsku. Við viljum halda áfram að efla gagnsæi, lýðræðisleg vinnubrögð og gott samstarf – alltaf með hagsmuni Mosfellsbæjar að leiðarljósi. Og já, ef við fáum keflið aftur eftir kosningar verður ráðning bæjarstjóra fagleg.

Ég er afar stolt af því sem við höfum áorkað á kjörtímabilinu. Mikilvægt er að meirihluti hvers tíma hugsi lengra en til fjögurra ára í senn. Sveitarfélag á að byggja upp með langtímahagsmuni að leiðarljósi og það höfum við gert.

Stafrænir innviðir, upplýsingaöryggi og innkaup

Við fórum í stórsókn í uppbyggingu stafrænna innviða og þjónustu og fjárfestum verulega í þeim. Um 40 verkefnum er þegar lokið og hafa þau bætt þjónustu, einfaldað ferla og sparað tíma. Fjöldi sveitarfélaga hefur kynnt sér nálgun Mosfellsbæjar. Þá höfum við styrkt upplýsingatækni, endurnýjað innviði með áherslu á öryggi og einfaldað innkaupaferla. Niðurstaðan er betri yfirsýn, bætt þjónusta og öruggara starfsumhverfi. Þetta skiptir máli – bæði fyrir íbúa og rekstur sveitarfélagsins.

LEDið og viðhaldið

Við erum að ljúka við að lýsa bæinn betur upp – götur, íþróttamannvirki og skólahúsnæði. Þegar hefur verið skipt út 1.400 af 3.000 lömpum, settir upp 50 rafmagnskassar og á þessu ári verður farið í stýribúnað götulýsingar.

Þetta er fjárfesting til framtíðar: minni orkunotkun, lægri rekstrarkostnaður og minni viðhaldsþörf. Það er auðveldara og kannski pólitískt klókara að velja sýnileg verkefni sem skila hrósi strax, en við völdum að ráðast í verkefni sem styrkja bæinn okkar til lengri tíma.

Við höfum einnig lagt mikla áherslu á viðhald eigna Mosfellsbæjar. Reglulegt og markvisst viðhald er skynsamleg fjárfesting sem minnkar hættuna á óvæntum og kostnaðarsömum verkefnum – sem við höfum því miður fengið að kynnast á kjörtímabilinu vegna skorts á viðhaldi í fortíðinni.

Mannauðurinn – hjarta samfélagsins

Ég get ekki lokið þessari grein án þess að tala um mannauðinn í bænum. Við höfum heldur betur fjárfest í honum með því að taka yfir reksturinn á félagsheimilinu okkar Hlégarði; flutningi félagsstarfs eldri borgara í Brúarland; styrkingu Bólsins og með áherslum okkar á Bókasafnið okkar og Listasalinn. Þá erum við líka nýbúin að undirrita samning um safn um sögu ullariðnaðarins í Álafosskvos. Með því erum við að varðveita og vekja athygli á sögu svæðisins og efla það sem áfangastað.

Ekkert sveitarfélag getur talist framúrskarandi nema það sinni mannauðnum vel sem þar býr. Mannauðurinn býr til þau félagslegu verðmæti sem gera bæ að samfélagi og ég er stolt af okkar þátttöku í því.

Halla Karen Kristjánsdóttir,
formaður bæjarráðs og skipar 2. sæti á lista Framsóknar.

Greinin var fyrst birt í Mosfellingi – 23. apríl 2026

Mosó módelið – skref í átt að betra jafnvægi

Posted on by Sandra Dís Bjarnadóttir

24. apríl, 2026

Á þessu kjörtímabili höfum við í Framsókn komið fram með Mosó módelið sem lausn við krefjandi starfsumhverfi í leikskólum sem hefur verið til staðar ekki bara í sveitarfélaginu okkar heldur líka á landsvísu. Módelið felur í sér að foreldrar skrá sérstaklega vistun barna síðdegis á föstudögum og yfir hátíðar. Með því er mönnun betur aðlöguð að raunverulegri þörf, sem gerir kleift að stytta vinnuviku starfsfólks leikskólanna. Það er áskorun að ná jafnvægi sem þjónar bæði börnum, foreldrum og starfsfólki.

Það er eðlilegt að nýjar leiðir mæti mót stöðu og að ekki gangi allt hnökralaust fyrir sig. Ég viðurkenni að í upphafi var ég efins um hvort það myndi virka fyrir okkur hjónin að sækja börnin klukkan 14 á föstudögum. Reynslan hefur sýnt mér annað.

Í dag finnst mér þetta fyrirkomulag hafa haft mjög jákvæð áhrif á fjölskylduna mína. Helgarnar byrja fyrr, og þegar líður á kvöldið á föstudögum þá höfum við þegar náð að verja meiri tíma saman en áður.

Ekki skerðing á þjónustu

Kjarni Mosó módelsins er þó sá að það er ekki verið að skerða þjónustu. Þjónustan er enn til staðar og leikskólarnir eru áfram opnir til klukkan 16 á föstudögum fyrir þá foreldra sem þurfa á þeirri þjónustu að halda. Foreldrar geta því áfram valið þann kost sem hentar þeirra aðstæðum. Fyrir þau börn sem þurfa að dvelja eftir klukkan 14 á föstudögum skapast rólegra umhverfi, þá er áreitið minna og færri börn á staðnum. Sem getur haft jákvæð áhrif á líðan þeirra.

Ég er sjálf tilbúin að sækja börnin mín klukkan 14 á föstudögum svo að starfsfólkið sem sinnir börnunum mínum geti nýtt sér styttingu vinnuvikunnar.

Ég hef oft heyrt frá foreldrum í öðrum sveitarfélögum að þau hafi þurft að hliðra til sinni vinnu vegna manneklu á þeirra leikskóla. Við höfum ekki þurft að takast á við slíkt. Ávinningurinn að mati okkar í Framsókn er skýr. Við leggjum áherslu á stöðugra starfsumhverfi til að minnka líkur á manneklu sem getur mögulega truflað starfsemi leikskólanna. Það má líka nefna að það hefur einnig dregið úr veikindadögum starfsfólks eftir að Mosó módelið var tekið upp. Sem bendir til betra starfsumhverfis.

Kjarninn í kerfinu

Kjarninn í kerfinu er að vinna með fólkinu, ekki gegn því. Kerfið tekur mið af raunverulegum þörfum bæði fjölskyldna og starfsfólks og leitast við að skapa jafnvægi sem nýtist öllum. Með því að bæta starfsskilyrði þeirra sem sinna börnunum daglega er verið að styrkja það umhverfi sem börnin alast upp í. Ég lít á þetta módel sem ekki aðeins lausn við starfsmannavanda heldur einnig sem kerfi sem bætir samveru og tengingu fjölskyldunnar í daglegu lífi. Þetta á ekki síst við um börnin okkar, sem eru grunnstoðir samfélagsins og framtíðarinnar.

Börnin hafa ekki síður þörf fyrir hvíld, ró og samveru eins og við fullorðna fólkið. Markmið okkar í Framsókn er skýrt, að efla líðan barna og skapa þeim betri aðstæður. Þegar starfsfólk býr við meiri stöðugleika og fjölskyldan fær aukið svigrúm til samveru, skilar það sér beint til barnanna. Þau upplifa meiri ró, stöðugleika og nærveru. Langir og þétt skipulagðir dagar í leikskóla geta verið krefjandi fyrir ung börn, og því skiptir máli að skapa jafnvægi og rými til hvíldar. Með því að stytta daginn, til dæmis einu sinni í viku, myndast meiri tími fyrir samveru fjölskyldunnar. Þetta snýst því ekki bara um skipulag eða rekstur, heldur um hvaða samfélagi við viljum búa í. Samfélag þar sem velferð barna, foreldra og starfsfólks fer saman er það samfélag sem Framsókn leggur áherslu á.

Sandra Dís Bjarnadóttir

6. sæti á lista Framsóknar

Greinin var fyrst birt í Mosfellingi – 23. apríl 2026

Lýðheilsa – lykill að betri lífsgæðum

Posted on by Sævar Birgisson

23. apríl, 2026

Lýðheilsa snýst um lífsgæði fólks á öllum aldri. Hún snýst um að skapa samfélag þar sem íbúar hafa raunveruleg tækifæri til að hreyfa sig, njóta útivistar og tileinka sér heilbrigðan lífsstíl sem styrkir bæði líkama og huga.

Alla tíð hef ég lagt mikla áherslu á heilbrigðan lífsstíl og íþróttir hafa skipað stóran sess í lífi mínu frá unga aldri. Ég trúi því að hreyfing og tækifæri til að stunda íþróttir við hæfi eigi að vera á allra færi, óháð efnahag eða aðstæðum. Ég er fyrrverandi afreksíþróttamaður í skíðagöngu og hef meðal annars keppt á Ólympíuleikum fyrir hönd Íslands. Ég hef einnig starfað við þjálfun og vinn í dag á vettvangi sem tengist útivist og hreyfingu. Í gegnum þessa reynslu hef ég séð hversu mikil áhrif regluleg hreyfing og gott aðgengi að aðstöðu hefur á heilsu og vellíðan fólks.

Það er sérstaklega mikilvægt að börn og ungmenni fái tækifæri til að stunda íþróttir og hreyfingu við sitt hæfi. Þar er ekki aðeins verið að leggja grunn að betri líkamlegri heilsu, heldur einnig að sterkari sjálfsmynd, betri andlegri líðan og góðum venjum sem geta fylgt fólki alla ævi. Við eigum að tryggja að þessi tækifæri séu aðgengileg öllum. Í Mosfellsbæ eru miklir möguleikar til staðar. Hér höfum við umhverfi sem býður upp á fjölbreytta hreyfingu og útivist, og mikilvægt er að halda áfram að byggja á þeim styrkleikum.

Gott stíganet, göngu- og hjólaleiðir, aðstaða til útiveru og gönguskíðaspor yfir veturinn þegar aðstæður leyfa skipta sköpum í daglegu lífi fólks. Einnig gefst tækifæri til að stunda fjölbreyttar íþróttagreinar utandyra, svo sem hlaup, hjólreiðar, skíðagöngu, hestaíþróttir og motocross, sem endurspeglar vel þann styrk sem felst í nánd við náttúruna. Sundlaugarnar gegna jafnframt lykilhlutverki og eru mikilvægur vettvangur fyrir heilsueflingu, endurheimt og samveru fyrir alla aldurshópa.

Uppbygging til framtíðar

Íþróttafélögin í Mosfellsbæ gegna afar mikilvægu hlutverki. Þar fer fram öflugt starf sem styrkir börn, ungmenni og fjölskyldur og skapar jákvætt samfélag. Það starf þarf áfram að styðja eins vel og kostur er, enda er það ein af undirstöðum góðrar lýðheilsu í bæjarfélaginu. Um leið þurfum við að horfa á lýðheilsu í víðara samhengi sem snýst einnig um daglega hreyfingu, gott nærumhverfi og að fólk á öllum æviskeiðum hafi raunhæf tækifæri til að lifa virku lífi.

Við í Framsókn viljum halda áfram að sinna vel aðstöðumálum tengdum íþróttum og vinna áfram að uppbyggingu, þar á meðal á Varmársvæðinu.

Áhersla á lýðheilsu er fjárfesting í betra samfélagi. Með því aukum við vellíðan, drögum úr heilsufarslegum áskorunum og styrkjum samfélagið í heild.

Eflum áfram lýðheilsu í Mosfellsbæ.

Sævar Birgisson
Bæjarfulltrúi og oddviti Framsóknar í Mosfellsbæ

Greinin var fyrst birt í Mosfellingi – 23. apríl 2026

Afhverju Framsókn?

Posted on by Elín Guðný Hlöðversdóttir

2. apríl, 2026

Ég heiti Elín Guðný Hlöðversdóttir og fæ þann heiður að skipa 4. sæti á lista Framsóknar í komandi sveitarstjórnarkosningum.

Í gegnum árin hef ég lagt mig fram um að vera virkur íbúi í Mosfellsbæ. Ég hef verið þátttakandi í foreldrafélögum leik- og grunnskóla barnanna minna frá því þau hófu sína skólagöngu árið 2015 og er enn, hef látið mig varða málefni Aftureldingar í gegnum íþróttaiðkun barnanna minna þar sem ég hef setið í stjórnum deilda innan íþróttafélagsins og einnig sinnt sjálfboðaliðastarfi.
Ég hef unnið með og í þágu íbúasamtaka Leirvogstungu frá árinu 2016 ásamt því að taka þátt í starfi Soroptimistaklúbbs Mosfellssveitar.
Þetta geri ég með ánægju og mikilli gleði því mér þykir gott og gaman að geta lagt mitt af mörkum.
Með þessa reynslu að baki tel ég komið að því að stíga næsta skref og bjóða fram krafta mína í komandi sveitarstjórnarkosningum.

Hver er Elín Guðný?

Ég er 39 ára gömul, gift og á tvö börn. Ég sleit barnsskónum í Grafarvoginum en flutti í Mosfellsbæ árið 2010. Hér höfum við fjölskyldan fest rætur og fundið samfélag þar sem okkur líður vel.
Ég er þeirrar gæfu aðnjótandi að starfa líka í Mosfellsbæ en ég vinn hjá fyrirtæki sem heitir LED skilti. Áður var ég í fjölda mörg ár í veitingageiranum og sú reynsla kenndi mér margt, meðal annars hvað samvinna er mikilvæg og hvað það er gott að geta unnið með breiðum hópi fólks.

Samfélagsþátttaka hefur verið mér hugleikin frá því ég flutti í Mosfellsbæ og ég hef lagt mig fram um að taka virkan þátt. Í gegnum þennan áhuga minn á samfélaginu hef ég fundið hvað það skiptir miklu máli að láta sig málin varða og hvað það er mikilvægt að vera reiðubúin að leggja hönd á plóg. Því saman byggjum við samfélagið okkar og það er mikilvægt að raddir okkar bæjarbúa heyrist.

Ástæðan fyrir því að ég vel að verja kröftum mínum með Framsókn byggir á minni eigin reynslu.
Í gegnum árin hef ég átt í samskiptum við bæinn vegna ýmissa málefna sem ég hef brunnið fyrir. Frá því að Framsókn komst í meirihluta hef ég fundið fyrir jákvæðum breytingum.
Síðustu 4 ár hefur verið hlustað og ekki bara hlustað, líka framkvæmt og það hefur svo sannarlega verið sýndur raunverulegur vilji til að gera vel fyrir íbúa Mosfellsbæjar.
Þó ekki sé hægt að verða við öllum óskum eða möguleiki á að ráðast í öll verkefnin í einu er tekið mark á því sem lagt er til, unnið úr því sem hægt er að gera og haldið uppi opnu samtali.
Það er sú nálgun sem ég vil standa fyrir.

Ég vil leggja áframhaldandi áherslu á opið samtal við íbúa og að ákvarðanir byggi á raunverulegum þörfum bæjarbúa.
Ég vil leggja mitt af mörkum til að Mosfellsbær verði áfram góður staður til að búa á.
Ég er vinnusöm og tilbúin að hlusta og leggja á mig vinnuna sem þarf til að láta verkin tala.

Elín Guðný Hlöðversdóttir
4. sæti á lista Framsóknar í Mosfellsbæ

Greinin var fyrst birt í Mosfellingi – 2. apríl 2026

Snemmtæk úrræði fyrir skólasamfélagið. Hvað er til ráða?

Posted on by Erla Edvardsdóttir og Þorbjörg Sólbjartsdóttir

Á undanförnum árum hefur Mosfellsbær vaxið jafnt og þétt og í dag eru 5 grunnskólar og 9 leikskólar starfræktir í bæjarfélaginu. Sem starfandi kennarar hér í bæ höfum við fundið fyrir vaxandi þörf á sértækum úrræðum af ýmsum toga fyrir börn og ungmenni sem kljást við félagslega einangrun, einhverfu, ADHD taugaþroskaröskun, tengslavanda, þroskaskerðingu, sjálfsskaða, geðraskanir, áhættuhegðun, tölvufíkn og hegðunarvanda. Auk þess sárvantar móttökudeild fyrir nýbúa með annað móðurmál en íslensku, en þeim hefur farið fjölgandi í bæjarfélaginu.

Hugmyndafræðin „skóli án aðgreiningar“ er flott á blaði en hefur ekki verið fylgt inn í skólakerfið með því fjármagni og sérþekkingu sem þarf til. Allt of fá úrræði hafa verið í boði fyrir börn með mikinn vanda og biðin eftir því að komast að hjá sérfræðingum oft allt of löng. Við það skapast mikið álag, bæði innan skólakerfisins og inn á heimilunum. En hvað er til ráða?

Við í Framsókn teljum að með því að koma upp miðlægðri þjónustumiðstöð sem býður upp á margskonar úrræði, sniðnum að þörfum hvers og eins, megi draga verulega úr þessu álagi. Í slíkri þjónustumiðstöð væru starfandi sérfræðingar á sviðum sálfræði, talmeinafræði, atferlistfræði, uppeldisfræði, nýbúafræði og kennsluráðgjafar, svo eitthvað sé nefnt. Þessir sérfæðingar gætu nýst öllum börnum leik-og grunnskólanna, líka yfir sumartímann. Þessir sérfræðingar kæmu inn í skólana eftir þörfum hverju sinni, auk þess sem húsnæði þjónustumiðstöðvarinnar væri nýtt til kennslu og námskeiðahalds. Þjónustumiðstöðinni væri einnig ætlað að veita foreldrum upplýsingar og aðstoð hvað réttindi barna þeirra varðar.

Hið sögufræga hús, Brúarland, væri tilvalið fyrir slíka þjónustumiðstöð, en undanfarin ár hefur húsnæðið verið nýtt til skólahalds og nemendum og starfsfólki liðið afar vel þar.

Með því að byggja upp miðlæga þjónustumiðstöð í Brúarlandi tryggjum við skólakerfinu hér í bæ greiðan aðgang að sérfræðingum og stuðlum að snemmtækri íhlutun sem líta þarf á sem fjárfestingu í framtíðinni, bæði fyrir einstaklinginn, fjölskyldu hans og samfélagið. 

Erla Edvardsdóttir, grunnskólakennari, skipar 6. sæti á lista Framsóknar í Mosfellsbæ
Þorbjörg Sólbjartsdóttir, grunnskólakennari, skipar 8. sæti á lista Framsóknar í Mosfellsbæ

Greinin birtist fyrst í Mosfellingi 28. apríl 2022

Ég vil eldast í Mosfellsbæ

Posted on by Aldís Stefánsdóttir og Halla Karen Kristjánsdóttir

Flest viljum við lifa lengi en enginn vill verða gamall. Hvert aldursskeið hefur sinn sjarma og maður þarf stöðugt að minna sig á að njóta þess hlutverks sem maður hefur á
hverjum tíma. Það er jafnframt mikilvægt á öllum þessum aldurskeiðum að við finnum
að við höfum tilgang, finnum að það sé hlustað á okkur, að við skiptum máli og njótum
virðingar.
Þegar kemur að þjónustu hins opinbera við eldra fólk þá eru þarfirnar jafn ólíkar og á
öðrum aldursskeiðum. Við þurfum nefnilega að gæta þess að skilgreina fólk ekki
eingöngu út frá aldri. Þrátt fyrir að fólk sé komið á eftirlaunaaldur þá er fjölbreytni innan
þess hóps af ýmsum toga.
Sumir eru hraustir líkamlega en aðrir ekki, sumir eru mjög vel á sig komnir andlega en
aðrir síður. Sumir eru vel staddir fjárhagslega og aðrir ekki. Sumir eiga mikið bakland í
sínum fjölskyldum og maka en aðrir eru ekki svo lánsamir. Þessar lýsingar geta átt við
um fólk á öllum aldri. Þannig má færa rök fyrir því að aldur sé afstæður.

Aldursvænt samfélag

En hvað er það sem málið snýst um þegar kemur að þjónustu við eldra fólk? Jú þar er
af nægu að taka. Húsnæðismál, heilbrigðisþjónusta, félagslíf, aðstöðumál og kjaramál
svo tekin séu dæmi. Auk þess mætti nefna aðkomu eldra fólks að stjórnkerfinu og
ákvarðanatöku þar.
Framsókn leggur áherslu á að ráðist verði í allsherjar endurskipulagninu á þjónustu við
eldra fólk. Aukin samvinna innan kerfisins yrði leiðarljósið í þeirri vinnu. Afraksturinn þarf
að vera persónumiðuð og sveigjanleg þjónusta. Fólk fengi þannig þá þjónustu sem það
þarf en ekki bara þjónustu sem hentar kerfinu að veita. Innleiða þarf tæknilausnir sem
nú þegar eru til þannig að þjónustan sé skilvirk, hröð og aðgengileg.
Annað lykilatriði sem er nauðsynlegt að nefna í þessu sambandi og þeir þekkja sem að
málum hafa komið er samvinna ríkis og sveitarfélaga þegar kemur að þjónustu við eldra
fólk. Samskipti um uppbyggingu hjúkrunarheimila og þjónustuíbúða í gegnum
óhagnaðardrifin leigufélög. Samskipti um heilbrigðisþjónustu sem þarf að veita inni á
heimilum og samskipti um kjör eldra fólks svo eitthvað sé nefnt. Það er mikilvægt að
sveitastjórnarfólk beiti sér stöðugt fyrir því að hægt sé að veita framúrskarandi
nærþjónustu og að þau hafi frumkvæði að uppbyggilegu samtali við ríkið í
málaflokknum.
Framsókn í Mosfellsbæ treystir sér til að vera leiðandi í þeirri kerfisbreytingu sem þarf
að eiga sér stað og lýst hefur verið stuttlega í þessari grein. Við treystum okkur til að hafa frumkvæði, setja okkur inn í málin og vinna ötullega að því að það verði gott að
eldast í Mosfellsbæ. Við treystum okkur til að eiga samstarf við hagsmunasamtök eldra
fólks til að raddir þeirra fái að heyrast og til að þau geti áfram haft áhrif á það hvernig
samfélagið okkar þróast. Við trúum því nefnilega að þjónusta við eldra fólk sé fjárfesting
í framtíðinni.

Ef þú vilt líka vera hreyfiafl í þínu samfélagi settu þá x við B í kosningunum 14. maí.

Halla Karen Kristjánsdóttir, 1. sæti á lista Framsóknar í Mosfellsbæ
Aldís Stefánsdóttir, 2. sæti á lista Framsóknar í Mosfellsbæ

Greinin birtist fyrst í Mosfellingi 28. apríl 2022

Ný Framsókn fyrir Mosfellsbæ

Posted on by Örvar Jóhannsson

14. maí n.k. göngum við til kosninga og fáum tækifæri til að nýta mikilvægustu mannréttindi sem við höfum, réttinn til að velja sjálf það fólk sem kemur til með að stýra málefnum samfélagsins okkar til næstu 4 ára. Ég gaf kost á mér til að taka sæti á lista Framsóknar í Mosfellsbæ í komandi sveitarstjórnarkosningum og var treyst fyrir 4. sæti listans.
Ég er 38 ára, bý ásamt eiginkonu minni og 3 börnum í Helgafellshverfinu, þar höfum við búið síðan árið 2019.  Ég er fæddur og uppalinn á Seyðisfirði og bjó þar óslitið þar til við fjölskyldan fluttum í Mosfellsbæ.  Okkur hefur hvergi liðið betur en einmitt hér.  Ég brenn fyrir það að hér búum við sem best að börnunum okkar, auk ýmissa annarra þátta sem ég og við í Framsókn munum kynna á næstu vikum.
Í nútíma sveitarfélögum verður ákall bæjarbúa og krafan um það að þjónustan sé veitt um leið og eftir henni er kallað sífellt háværari.  Stærsti þjónustuveitandi flestra einstaklinga er vafalítið, lögheimilissveitarfélag hvers og eins.  Það er því mikilvægt að til að mæta ákalli og kröfum bæjarbúa að sveitarfélagið sé stöðugt á tánum þegar kemur að nýtingu tæknilausna og þróunar í samskiptamiðlum við þá vinnu.
Í þessu sambandi tel ég mikilvægt að ávallt sé tryggt að vefsíða sveitarfélagsins sé góð og aðgengileg upplýsingaveita. Innra svæði vefsins fyrir íbúa, þ.e. „Mínar síður“, sé gagnvirkt svæði þar sem íbúar geta nálgast í rauntíma allar upplýsingar um þá þjónustu sem innskráður íbúi greiðir af til sveitarfélagsins. Ekki ósvipað því sem sjá má við kaup á lyfjum skv. lyfseðli, þar sem kemur fram annars vegar hlutur sjúklings af kostnaðinum og hins vegar hluti sjúkrasamlags.
Í ábendingakerfinu sem á vefnum er, fengist við innsendingu úthlutað málsnúmeri þar sem á hverjum tíma er hægt að nálgast upplýsingar um stöðu málsins í stjórnkerfinu, þ.e. ekki eingöngu stöðu eins og móttekið, í vinnslu, o.s.frv. heldur ítarlegri eftir atvikum, t.d. á borði hvaða nefndar, þjónustusviðs eða jafnvel ákveðins starfsmanns sveitarfélagsins málið er.
Ég tel mikilvægt að í þjónustu sveitarfélagsins við íbúa, sé stöðugt fylgst með tækniþróun til að þjónusta á hverjum tíma sé ávallt með því besta sem völ er á. Slíkri þróun fylgja vissulega alltaf einhver útgjöld, en líklegt er að til lengri tíma felist í raun sparnaður í því að endurnýja kerfin örar frekar en að vera stöðugt að greiða af og viðhalda eldri, oft á tíðum óskilvirkum kerfum, sem þrátt fyrir að hafa talist góð og gagnvirk á sínum tíma, eru einfaldlega börn síns tíma.
Ég er reiðubúinn til að leggja mitt af mörkum næstu fjögur árin til að gera okkar yndislega bæ enn betri. Ég er ávallt reiðubúinn að taka samtalið um hugmyndir og útfærslur úr öllum áttum og vinna að góðum málum sama frá hverjum þau koma.

Við á lista Framsóknar í Mosfellsbæ óskum eftir því að þú hugsir til okkar í kosningunum
þann 14. maí og setjir X við B á kjördag.

Örvar Jóhannsson,
skipar 4. sæti á lista Framsóknar í Mosfellsbæ

Greinin birtist fyrst í Mosfellingi 28. apríl 2022

Hálfa leið eða alla leið ?

Posted on by Halla Karen Kristjánsdóttir

Mosfellsbær er Heilsueflandi samfélag og hefur verið leiðandi í þróun verkefnisins sem hefur verið innleitt víða um land.
Framsókn í Mosfellsbæ vill leggja áherslu á áframhaldandi forystu, innleiðingu og rekstur verkefnisins og þannig setja lýðheilsu í forgrunn við alla ákvarðanatöku á vegum bæjarins. Við viljum ekki láta staðar numið við fallegt plagg, heldur þarf að fylgja því eftir með fjármagni og aðgerðum. 
Íþrótta- og tómstundastarf hefur verið og  verður mál málanna næstu árin.
Af hverju ? Jú það eru allir orðnir sammála um hversu mikið gildi heilbrigt íþróttastarf og tómstundir eru. Í samfélagi þar sem er mikill hraði og áreiti verður sífellt mikilvægara að leita leiða til að spyrna gegn streitu, kvíða og vanlíðan með öflugu framboði af leiðum til hreyfingar og samveru.
Framsókn í Mosfellsbæ vill hugsa stórt. Við viljum búa til sameiginlega framtíðarsýn
og vinna markvisst að því að hún verði að veruleika.

Við höfum allt til þess að vera fyrirmyndar Heilsubærinn Mosfellsbær og það á að vera
eftirsóknarvert að vera hér bæði fyrir íbúa og gesti. Bærinn okkar á að vera í fremstu röð
þegar kemur að heilsueflingu fyrir alla.   
Mosfellsbær nýtur gríðarlegra forréttinda. Hér er ósnortin náttúra í bakgarðinum, fjöll, dalir, lækir og vötn. Ein af  perlum okkar er Varmársvæðið sem er allsherjar íþrótta og
útivistaparadís. En það er ekki nóg að vera með íþróttaaðstöðu það þarf að hlúa að henni og sinna viðhaldi. Þegar kemur að framkvæmdum þarf að hugsa stórt og uppbygging íþróttamannvirkja á að vera metnaðarfull og þannig úr garði gerð að hún svari þörfum starfseminnar sem þar fer fram til framtíðar. Þannig verður hagur allra bæjarbúa hafður í fyrirrúmi.

Hvað er það sem nærir þig?

Jú svörin eru væntanlega eins misjöfn og þau eru mörg.  Því það sem nærir þig, nærir ekkert endilega aðra. Það er eins með börnin okkar og okkur sjálf það hafa ekki allir áhuga á sömu íþróttagreininni eða bara að æfa íþróttir yfir höfuð. Sumir finna hjartað slá hjá Aftureldingu, aðrir brenna fyrir jaðaríþróttum enn aðrir velja að fara í tómstundir eins og t.d. skáta, vera í tónlistaskólanum eða í kórstarfi.
Framsókn í Mosfellsbæ vill að stofnað verði til samráðsvettvangs allra þeirra sem koma að hreyfingu og tómstundum hjá bæjarfélaginu. Vegna þess að það er mikilvægt að auka samtalið og samvinnuna. Þannig aukum við líkurnar á því að forsvarsmenn félaga verði frekar meðvitaðir um hvað er helst á dagskrá í bænum og geti hjálpast að við að efla kynningu á því góða starfi sem fer fram hér í bæjarfélaginu okkar.  Því öll erum við að vinna að sama markmiðinu sem er að efla einstaklinginn andlega, líkamlega og félagslega.

Öflug sókn í íþrótta og tómstundastarfi er besta forvörn sem við getum veitt börnunum
okkar. Við foreldrarnir sem og afar og ömmur megum samt ekki gleyma hlutverki okkar.  Við erum fyrirmyndir. Eins og málshátturinn segir:
„Það sem þú gerir hljómar svo hátt að það sem þú segir heyrist ekki“ 

Halla Karen Kristjánsdóttir,
íþróttakennari og oddviti Framsóknar í Mosfellsbæ

Greinin birtist fyrst í Mosfellingi 7. apríl 2022

Tökum samtalið

Posted on by Sævar Birgisson

Sem íbúar í bæjarfélagi þá höfum við öll skoðanir á einhverjum málefnum er varða bæinn okkar. Hvort sem það tengist skipulaginu á nýjum stíg í hverfinu eða útdeilingu á leikskólaplássi fyrir barnið þitt. Ef þú sem íbúi hefur skoðun sem þú telur að geti komið að gagni þá skaltu láta í þér heyra. Eins frá sjónarhóli þess frábæra fólks sem starfa hjá sveitarfélaginu og sinna daglegri starfsemi í bænum okkar má gera ráð fyrir að þau hafi skoðanir á ýmsu sem hægt væri að gera betur. Það sama gildir um aðra hagsmunaaðila sem sjá tækifæri til úrbóta. Látið rödd ykkar heyrast.

Við viljum að á okkur sé hlustað og að við upplifum okkur sem mikilvæg. Við búum öll saman í bæjarfélaginu og viljum auðvitað að okkur og öðrum íbúum líði vel og allir þrífist eins og best verður á kosið. Við þurfum að eiga samskipti og stuðla að því að þau séu uppbyggileg og jákvæð og til þess fallin að gera bæinn okkar að enn betri stað til að búa á.

Þegar kemur að góðri stjórnun, samstarfi og samvinnu almennt eru markviss og uppbyggileg samskipti lykilatriði. Í sumum málum getur það beinlínis hamlað framþróun að hunsa eða leitast ekki eftir skoðunum hagsmunaaðila. það getur oft á tíðum fært mál í verri farveg og jafnvel sett þau aftur á byrjunarreit. Það er til að mynda ekki skynsamleg ákvörðun að leggja hjólastíg og reiðstíg hlið við hlið, það er ekkert sjálfsagt mál að allir sjái vandamálið við það en þeir sem stunda hestamennsku væru fljótir að benda á það væri ekki ákjósanlegt.

Bæjarfulltrúar starfa jú í umboði kjósenda, sem eru íbúar bæjarins. Þeim ber því skylda til að vinna ætíð með hagsmuni íbúa að leiðarjósi. Til þess að það geti gengið sem best þurfum við að vera dugleg að taka samtalið.

Sævar Birgisson
3. sæti á lista Framsóknar í Mosfellsbæ

Greinin birtist fyrst í Mosfellingi 7. apríl 2022.

Af því að það skiptir máli

Posted on by Aldís Stefánsdóttir

Tilvera okkar er full af áreiti og álitaefnum. Til dæmis hvort maður eigi að bjóða sig fram til setu í sveitarstjórn eða ekki.
Það eru ótrúlega margar ástæður fyrir því að gera það ekki. Trúið mér, ég er búin að fara yfir þær allar. En á endanum varð niðurstaðan sú að ég vil leggja mitt af mörkum. Mér finnst skipta máli hverjir stjórna og hvernig er stjórnað. Það er pláss við borðið fyrir fjölbreyttar skoðanir og það er mikilvægt að nýjar raddir fái að heyrast.

Við búum í samfélagi sem hefur alla burði til að geta þróast með kröfum nútímans og svarað kalli framtíðarinnar.
Þjónusta sveitarfélaga er gríðarlega mikilvæg og snertir hvert einasta heimili. Þegar þjónusta er þróuð, skipulögð og veitt, skiptir mestu máli að hlusta á þá sem þiggja hana og enn fremur þá sem veita hana. Ég tel að reynsla mín og þekking á starfsemi sveitarfélagsins geri mig að góðum hlustanda.

En það er ekki nóg að hlusta og hafa skoðanir. Það þarf líka að hafa reynslu og þekkingu til að greina aðalatriði frá aukaatriðum, kunna að afla sér upplýsinga og síðast en ekki síst að hafa nægilegan styrk til að geta tekið góðar ákvarðanir. Ég trúi því að áralöng reynsla í krefjandi verkefnum á vinnumarkaði geri mig hæfa til ákvarðanatöku.

Mosfellsbær hefur allt til að bera til að vera fyrirmyndar sveitarfélag. Það er mikilvægt að við leyfum okkur að hugsa stórt og hugsa lengra. Okkar bíða áskoranir við að byggja upp Mosfellsbæ framtíðarinnar.

Eftirköst heimsfaraldursins, móttaka og aðlögun innflytjenda, áhrif loftslagsbreytinga, breytt aldurssamsetning þjóðarinnar, frekari uppbygging íbúðarhúsnæðis, fjölgun íbúa og efling innviða. Þetta eru áskoranir sem við sem samfélag stöndum frammi fyrir, bæði til lengri og skemmri tíma. Það er af nægu að taka.

Ég er tilbúin að leggja mitt af mörkum og hlakka mikið til að heyra hvað brennur á íbúum í bænum. En svona verkefni vinnur enginn einn. Það skiptir máli að vera í góðum hópi fólks og eiga góða að.
Framsókn í Mosfellsbæ er fjölbreyttur og hæfileikaríkur hópur fólks sem brennur fyrir því að auka velferð í samfélaginu okkar og treystir sér til að hlusta á íbúa og taka góðar ákvarðanir.

Þetta verður eitthvað!

Samtalið gerir Mosfellsbæ að betri bæ

Posted on by Hilmar T Guðmundsson

Fólk talar saman af ýmsum ástæðum. Við deilum upplýsingum til að gera okkur lífið auðveldara, eflum félagsleg tengsl okkar við aðra og samtalið gerir okkur kleyft að hafa áhrif á hvernig aðrir upplifa okkur.

Löngunin í að hafa samskipti er forrituð í okkur öll. Við getum bara ekki þagað endalaust. Við tölum um veðrið og hvað á að vera í matinn í kvöld en mest þó um það sem aðrir eru að tala um.

Samtöl okkar á milli tryggja að við skiljum hvort annað, við erum stödd á sömu plánetu. Við hefjum yfirleitt samræður til að efla félagsleg tengsl og einnig af einskærri forvitni. Þetta á líka við á netinu. Fólk uppfærir stöðu sína til að skapa tengsl, jafnvel þegar fólk er landfræðilega fjarlægt. Stöðuuppfærslur innihalda oft félagslegar ábendingar eða spurninga og fólk bregst oft við með því að “líka við” eða skrifa athugasemdir. Ekki vegna þess að því líkar við efnið heldur vegna þess að það vill senda frá sér einföld skilaboð til að ýta undir áhuga þinn á málefninu. Í mörgum tilfellum er svo samtalið sem kemur í kjölfar stöðuuppfærslu mun mikilvægara eða skemmtilegra en stöðuuppfærslan sjálf.

Þó að fólk tali saman til að gera líf sitt auðveldara, til að mynda félagsleg tengsl og til að hjálpa öðrum, eru flest samtöl okkar eins konar markaðssetning á okkur sjálfum. Við upphefjum okkur sjálf með því að segja frá persónulegri upplifun okkar eða jafnvel slúðra um hver sé að gera hvað með hverjum. Yfirleitt er aðeins örlítill hluti gagnrýni eða neikvæðni. Langflest þessara samtala eru jákvæð þar sem við erum alltaf að passa upp á okkar ímynd.

Sjálfsmynd okkar mótast stöðugt af samtölunum sem við eigum við aðra. Hvort sem þú vilt eða ekki er gildum okkar og skoðunum deilt áfram, út frá fyrri samtölum við fjölskyldu, vini og frá fólkinu sem þú hittir, jafnvel örstutt á förnum vegi eða þú rekst á á rafrænni götu.

Gerum Mosfellsbæ betri með því að tala saman. Heilsumst út á götu, köstum kveðju á aðra í heita pottinum, gefum jákvæða strauma á netmiðlum. Tökum þátt í samtalinu en virðum skoðanir annara og veljum að taka það samtal sem okkur líður best með. Geymum gargið og hávaðann innra með okkur á meðan við vinnum úr því og eyðum síðan orkunni sem myndast í eitthvað jákvætt.

Höfundur er í 9 sæti á framboðslista Framsóknar í Mosfellsbæ.

Greinin birtist fyrst í Mosfellingi 17. mars 2022